Allir einstaklingar sem starfa á íslenskum vinnumarkaði greiða hluta af launum sínum í lífeyrissjóð og mynda þannig lífeyrissparnað. Greiðslur í lífeyrissjóð tryggja fólki framfærslu þegar einstaklingur nær 67 ára aldri (í sumum sjóðum er miðað við 65 ára aldur). Lífeyrisgreiðslur tryggja einnig örorku- og barnalífeyri ef sjóðfélagi missir starfsgetu og verður fyrir sannanlegum tekjumissi vegna veikinda eða slysa. Maka-og barnalífeyrir er síðan greiddur til maka og barna við fráfall sjóðfélaga. Að auki bjóða lífeyrissjóðir upp á hagstæð lán fyrir sjóðsfélaga, meðal annars til íbúðakaupa.
Kjarasamningar ráða í flestum tilfellum í hvaða lífeyrissjóð er greitt. Stundum kemur það ekki fram í kjarasamningi og þá er einstaklingi frjálst að velja í hvaða lífeyrissjóð hann greiðir. Sumir lífeyrissjóðir eru aðeins fyrir ákveðin hóp fólks, til dæmis Lífeyrissjóður starfsmanna Kópavogsbæjar og Lífeyrissjóður verkfræðinga.
Lágmarksiðgjald í lífeyrissjóð er 12% af heildarlaunum frá 16 ára aldri til 70 ára. Launþegar greiða 4% af launum sínum en launagreiðandi greiðir svokallað mótframlag sem er 8%. Í sumum stéttum er mótframlagið hærra til dæmis hjá opinberum starfsmönnum og bankamönnum.
Viðbótarlífeyrissparnaður er frjáls sparnaður þar sem einstaklingar geta lagt hluta af launum sínum inn á viðbótarlífeyrissparnað og fengið þannig mótframlag frá launagreiðenda. Flestir kjarasamningar kveða á um að ef launþegi greiðir 2% í viðbótarlífeyrissparnað greiði launagreiðandi einnig 2% á móti. Þannig er hægt að tvöfalda upphæð sparnaðar á einfaldan hátt. Sagt er að viðbótarlífeyrissparnaður sé hagstæðasti sparnaðurinn sem völ er á enda sjaldgæft að hægt sé að tvöfalda sparnaðinn strax við inngreiðslu.
Ef þú vilt vita meira um lífeyrissjóði, starfsemi þeirra og hvernig lífeyrir virka þá er sniðugt að kíkja inn á heimasíðu Landssamtaka lífeyrissjóða sem heitir www.gottadvita.is. Þar eru nákvæmar upplýsingar settar fram á einfaldan hátt, meðal annars í myndbandsformi.
